මිනිහෙකුට 5,000ක් වත් ණයට දෙන්න බැරි රටක් -  ජීවත්වීම සඳහා සටන් කරන ශ්‍රී ලාංකිකයෝ 

වැටුප ලැබුණු විටම ඉවරයි - ආර්ථික පීඩනයෙන් හෙම්බත් වූ ජනතාවගේ ඇත්ත කතාව..!

බඩු මිල අහසට, සාක්කු හිස් වෙලා - ශ්‍රී ලංකාවේ මධ්‍යම පන්තියත් දැන් අසරණයි

ශ්‍රී ලංකාවේ ජනතාව මුහුණ දෙන ආර්ථික පීඩනය ගැන පුළුල් විග්‍රහයක්

වැටුප් වැඩි නොවී ජීවන වියදම ඉහළ යාම

(සුජිත් මංගල ද සිල්වා)

ශ්‍රී ලංකාවේ බොහෝ පෞද්ගලික අංශ සේවකයන්ගේ වැටුප් පසුගිය වසර කිහිපය තුළ සැලකිය යුතු ලෙස ඉහළ ගොස් නැත. නමුත් ආහාර, ප්‍රවාහන, විදුලිය, ජලය, අධ්‍යාපනය සහ සෞඛ්‍ය වියදම් අඛණ්ඩව ඉහළ ගොස් ඇත.

එහි ප්‍රතිඵලය වන්නේ, වැටුපෙන් මාසය ගෙවා ගැනීමට නොහැකි වීම-ඉතිරි කිරීමේ හැකියාව අහිමි වීම-හදිසි අවස්ථාවක මුදල් සොයා ගැනීමට අපහසු වීම ආදිය වේ. කලින් මාසික ආදායමෙන් කොටසක් ඉතිරි කළ පවුල් අද වැටුප ලැබෙන දිනයේ සිටම ණය ගෙවීමටත් බිල්පත් ගෙවීමටත් මුදල් වෙන් කරයි.

මධ්‍යම පන්තියේ බිඳවැටීම

ආර්ථික අර්බුදයෙන් වැඩිම බලපෑමක් එල්ල වී ඇත්තේ මධ්‍යම පන්තියටය. ඔවුන්ට කලින්, වාහනයක් තිබුණා-දරුවන් පෞද්ගලික පන්ති යැව්වා-වසරකට වරක් සංචාරයක ගියා.නමුත්  අද, ඉන්ධන වියදම ගැන කල්පනා කරනවා-දරුවන්ගේ අධ්‍යාපන වියදම් කළමනාකරණය කිරීමට අමාරුයි-අමතර වියදම් සියල්ල කපා හැර තිබෙනවා.

මේ නිසා දරිද්‍රතාවයට පත්වන මධ්‍යම පන්තියක් නිර්මාණය වෙමින් පවතින අතර අද එවැනි බොහෝ පවුල් ජීවත් වන්නේ බැංකු ණය, ලීසිං, ක්‍රෙඩිට් කාඩ්පත් සහ මයික්‍රෝ ෆිනෑන්ස් ණය මතය.

එක් ණයක් ගෙවීමට තවත් ණයක් ගැනීම සාමාන්‍ය තත්ත්වයක් වී තිබේ. ඒ නිසා සිය සහෝදරයකුට, ඥාතියෙකුට හෝ මිත්‍රයෙකුට රුපියල් 5,000ක් වත් ණයට තබාපොළියට දීමටවත් බොහෝ දෙනාට නොහැකි වී ඇත. ඒ ඔවුන් සතුව මුදල් නොමැති නිසා පමණක් නොව, ඔවුන්ගේම ණය බර අධික නිසාය.

ජනතාවගේ මිලදී ගැනීමේ ශක්තිය කෙතරම් පහළ ගොස් තිබෙනවා දැයි කිව හොත්  අද රුපියල් 1,000කින් ගත හැකි භාණ්ඩ ප්‍රමාණය වසර කිහිපයකට පෙර රුපියල් 500කින් ගත හැකි වූ ප්‍රමාණයටත් අඩුය. එබැවින්, මුදලේ නාමික අගය තිබුණත් සැබෑ මිලදී ගැනීමේ ශක්තිය අඩු වී ඇත. මේ නිසා ජනතාවට "සල්ලි තියෙනවා වගේ පේනවා, නමුත් කිසි දෙයක් කරන්න බැහැ" යන හැඟීම ඇති වී තිබේ.

මේ ආර්ථික පීඩනය හේතුවෙන් පවුල් සබඳතා සහ මිත්‍ර සබඳතා ද ඇතුළු සියලු සමාජ සම්බන්ධතා පවා අභියෝගයට ලක් කර තිබේ.  කලින්:අතමාරුවක් දෙන මිතුරන් සිටියා-ඥාතියෙක් උදව් කළා. අද:හැමෝම තමන්ගේ ජීවිතය බේරා ගැනීමේ සටනක යෙදිලා.කිසිම කෙනෙකුට කිසිවෙකුට උදව් කිරීමට කැමති වුවත් ඒ සඳහා හැකියාවක් නැහැ. "අනේ මචං අනාථයි" යන වාක්‍යය අද සමාජයේ ආර්ථික යථාර්ථය පිළිබිඹු කරන වාක්‍යයක් බවට පත්වී තිබේ.

ආර්ථික අර්බුදය මුදල් පිළිබඳ ප්‍රශ්නයක් පමණක් නොවේ. එම අර්බුදය මානසික ආතතිය, පවුල් ගැටලු, විදේශගත වීමේ ආශාව, තරුණ පරපුරේ බලාපොරොත්තු බිඳ වැටීම වැනි සමාජීය ප්‍රතිවිපාක ද ඇති කරයි. බොහෝ දෙනා අද ජීවත් වන්නේ සංවර්ධනයක් සිතා නොව, "මේ මාසය කොහොමහරි ගෙවා ගන්නේ" යන මානසිකත්වයෙනි.

ශ්‍රී ලංකාවේ වර්තමාන ආර්ථික පීඩනය සංඛ්‍යා ලේඛනවලින් පමණක් මැනිය නොහැකි සමාජීය අර්බුදයකි. ජනතාවගේ අතේ මුදල් සංසරණය අඩුවී තිබේ. වැටුප් ජීවන වියදමට සරිලන මට්ටමක නැත. ණය බර වැඩි වී ඇත. ඒ නිසාම රුපියල් 5,000ක අතමාරුවක් දීමටවත් බොහෝ දෙනාට නොහැකි තත්ත්වයක් නිර්මාණය වී තිබේ.

මේ තත්ත්වය පුද්ගලයෙකුගේ හෝ පවුලක ගැටලුවක් නොව, ශ්‍රී ලංකාවේ විශාල ජන කොටසක් මුහුණ දෙන ආර්ථික සහ සමාජීය යථාර්ථයකි. එහි වඩාත්ම වේදනාකාරී ලක්ෂණය වන්නේ "දුප්පත් මිනිසා පමණක් නොව, මධ්‍යම පන්තියත් දැන් ආර්ථික අසරණභාවයේ සීමාවට තල්ලු වී තිබීම" යන්නයි.